Telexornal

Boas grumete! 😊

Quero que fagas algo moi, moi divertido. Quero que intentes ser xornalista! Eu creo que podes conseguilo! Como? Pois agora che explico porque é moi, moi sinxelo.

Quero que penses algo divertido que pasara estes días e que mo contes coma se fose unha noticia do telexornal, pero en vez de falar das cousas dos políticos ou do coronavirus quero que me fales da túa vida e que o graves en vídeo. Queres que che poña un exemplo?

Pois imaxina que eu digo, con voz súper seria de presentador...

Queridos espectadores, hai dous días un lagarto intentou entrar na miña casa. Foi moi divertido porque foi visitando todas as ventás da casa ata encontrar unha aberta. Cando conseguiu entrar esperou a que me descalzase para lamberme os pés e fíxome cóxegas. Case escacho coa risa!

Esa sería a miña noticia, pero vós tedes que inventar unha distinta e contarma, vale? Recordade que o vídeo ten que durar entre 20 e 60 segundos. Si? Pois adiante! Despois pasádesmo a imaxinaenpalabras@gmail.com

Teño moitísimas ganas de velo! 😀😀

Adiante grumete!!! 🙌🙌🙌

Envío de cartas!!!

Querido grumete,

Non sei se sabes que son amigo dos paxariños. Son moi amigo dos paxariños. Eu son o mellor amigo dos paxariños do mundo mundial! Cando manexas un barco é imposible non ser amigo deles…  Grazas aos paxaros sei se estou cerca da terra ou perdido no medio do mar. Grazas aos paxaros guíome se aprendo as súas migracións. Grazas ao ánimo dos paxaros intúo que tempo vai facer e sei que roupa poñerme. Grazas aos paxaros voa a miña imaxinación.

Como agora estou confinado e non podo saír, tampouco podo velos. Ás veces asubío dende a casa e intento imitar a lingua dos paxaros, pero a eles non lles gustan as casas porque prefiren as árbores e xa nunca se paran a falar comigo.

O que quería contarte é que alguén enviou unha mensaxe atada na pata dunha ave á miña ventá.

Escribiume moitas cousas que non podo contar porque son un segredo, pero grazas a iso sei que a mensaxe veu da escola. Si! Adiviñeino! Non podo contar como, mais descubrino. E aínda que non saiba quen me enviou a carta, fíxome moita ilusión.

Por esa razón, quero invitarte a que lle escribas unha carta a algún compañeiro ou compañeira que botes en falta e que teñas ganas de velo. Ela, ou el, vai estar desexando que lle contes a súa vida. Pode ser unha carta, dúas, tres...  Envía as cartas que queiras, pero acórdate de firmalas e de facelas ben!!!

Como agora non é moi boa idea mandalas por Correos, voume ocupar eu do envío   ✌✌✌

Mándalla ao teu amigo enviándoa imaxinaenpalabras@gmail.com .  Eu prometo que non a miro! E, se non a podo enviar agora, deixareina na escola para que cando volvamos a vexa, pero seguro que se pode!

Antes de mandala lembra que tés que dicir como te chamas e a quen lla queres enviar. Ah! E repasa en internet como se escribe unha carta. Que hai que ser profesionais, eh! Vale?

PD: Se tes algunha dúbida, podes escribila nos comentarios e así resolvemos as de todos 😊😊😊

Adiante grumete!!! 🙌🙌🙌

CARTA DO CAPITÁN HORATIO McCALLISTER

Boas, son o capitán Horatio McCallister 😊

O voso profe Carlos, que agora quere facerse pasar por capitán, deixoume falar contigo. ARRRRRR!!!

Son parco en palabras, así que non me vou estender moito. Eu fíxenme famoso porque saio na serie esa de debuxos…  Como se chama? Os Simpsons!!! Si, iso é: Os Simpsons!!! Sei que son un bo actor, pero, en realidade, o que me gusta a min é a mar. Onde eu estou cómodo é no mar!!! 

VIVA O MAR!!! ARRRRRR!!!

Pois ben, grumete! Eu ben sei que algún día vas querer ser capitán, non si? Iso de ser un grumete está ben ao principio, pero…

En fin, vouche ensinar a canción que me deu fortaleza cando era un meniño que se embarcaba na súa primeira aventura. Ensinouma o capitán cando era un grumete. Canta comigo!!! ARRRRRR!!!

Unha tartaruga

Tartaruga loura

Tartaruga torta

Que tropeza

Coa torca

Trala porta

Da máis grande roca do mar

ARRRRRR!!!

Grazas a esta canción logrei ser un valente mariñeiro. Agora é para ti, meu amigo. Cántaa durante os próximos días e faina túa!!! Eu volverei para ver como che vai!!!

ARRRRRR!!!

Ata pronto grumete!!! 🙌🙌🙌🙌

BOAS GRUMETE!

Acabo de construír este barco e é enorme! Xigante! Indestrutible! Abraiante! Supercalifraxelisticoespiali… Ben… Vou parar que me estou emocionando…

O que debes saber é que son Carlos e son o capitán! Gústame ler, escribir e viaxar por horizontes nunca vistos! Descubrir mundos novos! Gústame o chocolate! Os tomates! As baleas! As quenllas! As sardiñas nas cacharelas! E, sobre todo, GÚSTAME O MAR! HA, HA, HA!

No noso barco non hai perigo de enfermar nin de nada, de nada, de nada, de nada, de nadísima. Todo o contrario! Imos facer cousas moi divertidas, DIVERTIDÍSIMAS!!!

APÚNTASTE Á AVENTURA? 😁😁😁

Explícoche: o barco no que imos navegar é un pouco distinto ao que imaxinas. Estou convencidísimo!!! Talvez non sexa de madeira nin sirva para ir a pescar, pero está feito nas redes… Iso seguro!!! Nas redes de internet!!!

Xa o irás descubrindo pouco a pouco. Xa verás! Vas alucinar! Estou emocionadísimo!!!

Pero a ver. Voume centrar… Que che parece se te me presentas? Hai moitos tipos de mariñeiros. Quero saber de que pasta estás feito! O barco é moi grande e dá moito traballo e diversión. Que tipo de grumete queres ser? Cóntamo ben nos comentarios e mándame o teu debuxo a imaxinaenpalabras@gmail.com

PRESÉNTATE GRUMETE! 
HA, HA, HA! 🙆🙆🙆